Cagablea.net: mai un blòg nissart?

Benvenguda! Benvenguda sus aquest blòg, Cagablea.net.

Mai un blòg nissart? Ben voèi. L’idea mi virava en testa despì un bèu moment, de partagiar li mieu conoissenças, d’informacions, de gaubre, qu’ai poscut amagar sus lo mieu camin. Aurii poscut participar à un dei blògs ò site qu’esistron e fan viure l’atualitat nissarda, ma si refèm pas: quora sies un Bastian, ti cau faire lo contràri! E pi sobretot perqué la tècola es pas d’amolonar un nouvèu blòg nissart, ma d’ofrir un contengut que pensi originau encuèi, en rapoart diret emb cen que sabi faire à pauc près: l’informatica e la lenga.

Au travalh lu mieu colègas mi dihon « lou nissart » ; À Nissa lu mieu colègas mi traton da « geek », vi prepaui doncas un blòg de geek nissart, emb de ver mocelas de blea 2.0 dintre. Té, na pichin’istòria per ilustrar cen que dii: lo nom d’aquesto site Cagablea.net es ren d’autre que lo resultat d’aquest encrosilhament entra lo mieu afet de Nissa e lo sieu país e li mieu pelegrinacions sus lo ret. Perqué au lendeman de l’accès de l’OGC Nissa à l’elita dau balon-pen en lo 2002, mi registri sus un dei doï màger fòros dedicats au Gym, e devi chausir un pseudònim. Chausissi Caga blea, que coma degun saup en çà de Sant Laurenç de Var, significa « que caga de blea » en referença à la nemaiada dei nissarts que lur an donat lu sieu vesins d’en Contéa. Pareisse que lu Seguran an la propencion de n’en usar e abusar dins la sieu coïna… Là, avant d’èstre un blòg, Caga blea es sobretot devengut per ieu un ver pseudònim sus lo ret, e dins la vida.

La mieu linha directriça es dobla: menar lu gents à la lenga, menar la lenga ai gents.

Eccò ben dètz ans qu’ai d’activitats que tornon alentorn de la curtura nissarda e de l’informatica. Regargi l’estat dau ret nissart e doni de coups de man à seneca e à drecha ai projets ò oèbmestres mai ò mens qualificats. La mieu linha directriça es dobla: menar lu gents à la lenga, menar la lenga ai gents. Es aquò que m’a motivat dins lu quauqu projets qu’ai menat ; la mieu grana fiertà en aquest jorn – après lu mieu enfants – es l’Operacion Menica, e de mi dire que d’enfants an agut envuèia d’emparar lo nissart en puant au Raï: menar li gents à la lenga. E pi li a lo projet de revirar un logiciau liure, SPIP, per n’en prepauar una version nissarda, que d’autres porràn utilisar per crear de site oèb nissart: menar la lenga ai gents.

Proverai au fiu dau temps d’enriquir aquesto blòg emb la mieu esperiença sus aquelu subjèctes, de dorsiers puslèu tecnicos sus l’internacionalisation e la localisacion de sites oèb, sus li nòrmas e estandards de lengas en informatica. Consacrarai d’articles dedicats à la lenga, en utilisant que possible una dei foarças dau ret: lo multimèdia. L’i parlerai tamben de l’atualitat nissarda, un pauc, per lu mieu coùps de coar e li mieu partatges. E sobretot, proverai coma poadi de far sistematicament una version en nissart de cada pagina ò article. Perqué coma v’en siètz enavisat damont à drecha d’aquesta pagina ò en fin d’article, una version en nissart es disponible ; cresi qu’ai capitat une localisacion de toï lu aspets dau site, despì lu titres, tèstos, medias, fins ai formats de datas, e cunti v’en faire profitar lo mai possible.

Eviva!